Fótbóltssambandið fer í døgunum 19.-20. mars 2010 at skipa fyri eini ráðstevnu um barna- og ungdómsvenjing. Eftir vitjaninar í feløgunum í seinasta kappingarári, verður mett, at stórur tørvur er á íblástri til teir venjarar, sum dagliga virka í yngru deildunum úti í feløgunum.

Endamálið við ráðstevnuni er, at venjarar kunnu hittast og fáa eina rúgvu av tilfari, hugskotum og íblástri annars, at taka við sær heim aftur til feløgini.

Niðanfyri eru nakrir upplýsingar um ráðstevnuna:

Fyribils skrá:
Fríggjadag 19. mars:
Byrjað verður kl. 17.00 og hildið verður áfram til umleið 21.00.

Leygardag 20.mars:
Byrjað verður kl. 09.00 og hildið verður áfram allan dagin. Tiltakið endar við einum felagsdøgurða.

Innihald:
Ráðstevnan verður skipað sum eitt verkligt tiltak, har tað bæði verða venjingar á vøllinum, nakrir fyrilestrar, eins og aktuel evni verða umrødd.

Umframt tilfar, íblástur o.a. so fáa allir luttakararnir døgurða fríggjakvøld, máltíð á middegi leygardag og døgurða leygarkvøld, umframt kaffi v.m.

Luttakarar:
Ráðstevnan er serliga ætlað barna –og ungdómsvenjarum og teimum, sum í heila tikið hava áhuga fyri fótbóltsvenjing.

Tilmelding:
Tá skráin er fastløgd, verður ein innbjóðing send feløgum, venjarum og løgd á heimasíðu FSF’s. Hetta skriv er fyri at venjarar, og onnur áhugað, kunnu seta eitt stórt X í álmanakkan 19.-20 mars 2010.

Um ivamál og/ella spurningar eru, kunnu tit seta tykkum í samband við undirritaða.

Við ítróttarkvøðu
FÓTBÓLTSSAMBAND FØROYA

Pætur S. Clementsen
patur@football.fo
Tlf. 267494
ella +44 7593 238353